Hlutverk Jafnréttisstofu

Jafnréttisstofa var opnuð á Akureyri í september 2000. Hún annast stjórnsýslu á sviði jafnréttismála í samræmi við lög um jafna stöðu og jafnan rétt kvenna og karla nr. 10/2008 og heyrir undir yfirstjórn félags- og jafnréttismálaráðherra.

Hlutverk Jafnréttisstofu er skilgreint í 4. grein jafnréttislaganna en þar kemur fram að verkefni sem Jafnréttisstofa annast eru m.a. að:  

  1. hafa eftirlit með framkvæmd laganna,
  2. sjá um fræðslu og upplýsingastarfsemi,
  3. veita stjórnvöldum, stofnunum, fyrirtækjum, félögum og einstaklingum ráðgjöf í tengslum við jafnrétti kynjanna, 
  4. koma á framfæri við ráðherra, Jafnréttisráð og önnur stjórnvöld ábendingum og tillögum um aðgerðir til að ná fram jafnrétti kynjanna, 
  5. koma með tillögur að sértækum aðgerðum, 
  6. auka virkni í jafnréttismálum, m.a. með aukinni aðild karla að jafnréttisstarfi, 
  7. fylgjast með þróun jafnréttismála í þjóðfélaginu, m.a. með upplýsingaöflun og rannsóknum, 
  8. veita jafnréttisnefndum, jafnréttisráðgjöfum og jafnréttisfulltrúum sveitarfélaga, stofnana og fyrirtækja aðstoð,
  9. vinna að forvörnum gegn kynbundnu ofbeldi í samstarfi við önnur stjórnvöld og samtök sem sinna slíkum forvörnum sérstaklega, 
  10. vinna gegn launamisrétti og annarri mismunun á grundvelli kyns á vinnumarkaði,
  11. leita sátta í ágreiningsmálum sem Jafnréttisstofu berast og varða ákvæði laga þessara,
  12. breyta hefðbundnum kynjaímyndum og vinna gegn neikvæðum staðalímyndum um hlutverk kvenna og karla,
  13. vinna önnur verkefni í samræmi við markmið laganna samkvæmt nánari ákvörðun ráðherra.