Evrópusáttmáli um jafna stöðu kvenna og karla í sveitarfélögum og héruðum

Samband íslenskra sveitarfélaga, ráðuneyti jafnréttismála og Jafnréttisstofa tóku höndum saman um að láta þýða Evrópusáttmála um jafna stöðu kvenna og karla í sveitarfélögum. Sáttmálinn var kynntur fyrir sveitarfélögum í maí 2008 og í kjölfarið undirrituðu Akranes, Akureyri, Mosfellsbær, Reykjavíkurborg og Hafnarfjörður sáttmálann.

Evrópusáttmáli um jafna stöðu kvenna og karla í sveitarfélögum er gefinn út af Evrópusamtökum sveitarfélaga (CEMR) sem Samband íslenskra sveitarfélaga er aðili að. Fjöldi fólks lagði hönd á plóg við gerð sáttmálans, þ.e. kjörnir fulltrúar og starfsmenn sveitarfélaga, sérfræðingar um jafnréttismál og margir fleiri, en verkefnið var styrkt af Evrópusambandinu.

Í júní 2009 höfðu 874 sveitarfélög, af öllum stærðum og gerðum, vítt og breitt um Evrópu, undirritað sáttmálann og stöðugt fleiri bætast í hópinn. Sáttmálinn er bæði hentugt tæki fyrir sveitarfélög í löndum þar sem jafnréttisumræðan er skammt á veg komin, eins og til dæmis víða í Austur-Evrópu, en einnig í löndum þar sem hún er lengra komin, svo sem á Norðurlöndunum. Sáttmálinn er yfirgripsmikill og skiptist í eftirfarandi kafla:

Almennur rammi um jafna stöðu kvenna og karla
Hið pólitíska svið
Sveitarfélagið sem vinnuveitandi
Opinber innkaup og samningar
Sveitarfélagið sem þjónustuveitandi
Skipulagsmál
Sveitarfélagið sem eftirlitsaðili
Samstarf við önnur sveitarfélög innanlands og utan

Margt af því sem tiltekið er í sáttmálanum er þegar fyrir hendi í íslenskum sveitarfélögum enda bundið í lög á Íslandi, en annað er nýtt og athyglisvert og skapar sóknarfæri fyrir sveitarfélögin á þessu sviði. Í sáttmálanum er kveðið á um að þau sveitarfélög sem undirrita hann skuldbindi sig til að gera jafnréttisáætlun (aðgerðaáætlun) um helstu forgangsmál og hvernig þau ætli að ná árangri á þeim sviðum. Á framangreindri ráðstefnu kynnti CEMR drög að leiðbeiningum um gerð slíkra áætlana auk þess sem kynntar voru aðgerðaáætlanir nokkurra sveitarfélaga.

Hér má lesa Evrópusáttmálann um jafna stöðu kvenna og karla í sveitarfélögum og héruðum