Jafnréttiskennitala

Samstarfssamningur vegna verkefnisins Jafnréttiskennitala fyrirtækjanna, var undirritaður í Þjóðmenningarhúsinu, þriðjudaginn 11. apríl síðast liðinn. Rannsóknasetur vinnuréttar og jafnréttismála við Viðskiptaháskólann á Bifröst stendur að verkefninu, en samstarfsaðilar þess eru Viðskiptaráðuneytið, Samtök atvinnulífsins, Félag kvenna í atvinnurekstri, Jafnréttisráð og Jafnréttisstofa. Í verkefninu felst m.a. eftirfarandi:

• Birtar verða árlega grunnupplýsingar um fjölda kvenkyns stjórnarmanna og stjórnarformanna í 100 stærstu fyrirtækjunum hér á landi.
• Birtar verða árlega upplýsingar um fjölda æðstu stjórnenda innan fyrirtækjanna, þ.e. framkvæmdastjóra og forstjóra.
• Mótaðir verða fleiri mælikvarðar á árangur fyrirtækja í jafnréttismálum og birtar upplýsingar á grundvelli þeirra.
• Þróuð verður Jafnréttiskennitala fyrirtækjanna, sem er ætlað að sýna svart á hvítu hvaða árangri hvert fyrirtæki fyrir sig hefur náð í jafnréttismálum.