Fréttir

Föstudaginn 23 september ver Guðný Gústafsdóttir doktorsritgerð sína: Miðlað í gegnum meginstrauminn: Ímynd(ir) kvenleika og þegnréttar á Íslandi samtímans 1980-2000.   Vörnin fer fram í Hátíðasal Háskóla Íslands kl 14:00 og er öllum opin. Andmælendur eru  dr. Karen Ross, prófessor í kynja- og fjölmiðlafræði við háskólann í Newcastle og dr. Guðný Guðbjörnsdóttir, prófessor í uppeldis- og menntunarfræði, Menntavísindasviði Háskóla Íslands. Leiðbeinandi var dr. Þorgerður Einarsdóttir, prófessor í kynjafræði og í doktorsnefnd sátu auk Þorgerðar dr. Helga Kristín Hallgrímsdóttir, dósent við háskólann í Viktoría, Kanada og dr. Sigríður Matthíasdóttir, sjálfstætt starfandi sagnfræðingur við Reykjavíkurakademíuna.

Dagana 30. nóvember til 2. desember verður haldin ráðstefna í Helsinki, Finnlandi, þar sem fjallað er um heimilisofbeldi og ofbeldi í nánum samböndum. Markmið ráðstefnunnar er að varpa ljósi á gerendur í ofbeldismálum og kynna verkefni og úrræði sem skilað hafa bestum árangri á Norðurlöndum.  Ráðstefnan mun verða vettvangur frekari samvinnu þeirra sem vinna að forvörnum í ofbeldismálum og annarra sem fjalla um málflokkinn ýmist í rannsóknum eða þjónustu. Miðlun þekkingar, erindi og vinnustofur taka sérstaklega til eftirfarandi sviða: • Meðferðarþjónusta fyrir gerendur • Rannsóknir á gerendum • Gerendur og félagsleg úrræði Ráðstefnan er liður í dagskrá vegna formennsku Finnlands í Norrænu ráðherranefndinni árið 2016 og er haldin er í samstarfi RIKK – Rannsóknarstofnunar í jafnréttisfræðum við Háskóla Íslands, NIKK – norrænnar upplýsingamiðstöðvar um kynjajafnrétti – og velferðarráðuneytis Finnlands.  Hér má finna nánari upplýsingar um ráðstefnuna, dagskrá og skráningu

Jafnréttismál eru sveitarstjórnarmál Föstudaginn 16. september kl. 09:00 boðar Akureyrarbær í samstarfi við Jafnréttisstofu til Landsfundar jafnréttisnefnda sveitarfélaga. Á fundinum verður fjallað um skyldur sveitarfélaga samkvæmt jafnréttislögum, konur í sveitarstjórn, nýmæli í jafnréttisáætlunum, aðgerðir gegn ofbeldi, jafnrétti í skólastarfi og fleira. Sveitarstjórnarfólk er hvatt til að fjölmenna á landsfundinn.  Dagskrá og skráning á landsfund Jafnréttislög í fjörutíu ár Í tengslum við landsfundinn boða Jafnréttisstofa og Jafnréttisráð til ráðstefnu fimmtudaginn 15. september kl. 11:00. Tilefnið er að fjörutíu ár eru liðin frá því fyrstu jafnréttislögin voru sett á Íslandi og fimm manna Jafnréttisráð skipað til að annast framkvæmd laganna. Á ráðstefnunni verður farið yfir þróun jafnréttislaga, stöðuna í dag og hvað sé brýnast að gera. Ráðstefnan er öllum opin. Dagskrá og skráning á ráðstefnuna

Undanfarin tvö ár hefur Jafnréttisstofa tekið þátt í verkefni um samræmda jafnréttisfræðslu í Evrópu. Frumkvöðull þessa verkefnis var jafnréttisskrifstofa fylkisins Niederösterreich sem staðsett er í borginni St. Pölten norður af Vínarborg. Aðrir þátttakendur voru fulltrúr félagasamtaka í Króatíu og Litháen. Verkefninu er nú lokið með útgáfu „námskrár“  (e. curriculum) sem ætlað er að gagnast öllum þeim sem þjálfa fólk til jafnréttisfræðslu (e. train the trainers).

Síðustu þrjú ár hefur  NIKK, Norræn upplýsingamiðstöð um kynjajafnrétti, styrkt rúmlega 120 samstarfsverkefni á Norðurlöndunum. Verkefnin eiga það sameiginlegt að hljóta styrkina í gegnum Norræna Jafnréttissjóðinn sem NIKK hefur umsjón með en er rekinn af Norrænu ráðherranefndinni.  Nú hefur NIKK gert aðgenilegan gagnagrunn sem kynnir þessi verkefni og veitir upplýsingar um markmið þeirra og ábyrgðaraðila. 

Jafnréttisráð óskar eftir tilnefningum til fjölmiðlaviðurkenningar Jafnréttisráðs.  Í ár mun Jafnréttisráð, ásamt ráðherra jafnréttismála, veita sérstaka fjölmiðlaviðurkenningu aðilum sem hafa skarað fram úr þegar kemur að umfjöllun um mál sem tengjast jafnrétti kynjanna á liðnu ári. Viðurkenningu getur hlotið:  a. Fjölmiðill sem skarað hefur fram úr á sviði jafnréttismála, s.s. hvað varðar efnistök, umfjöllun og miðlun efnis.  b. Þáttur, þáttaraðir, greinar eða annað afmarkað efni þar sem jafnrétti er sérstakt viðfangsefni eða leiðarstef. c. Einstaklingur sem með störfum sínum á fjölmiðli hefur unnið sérstaklega að jafnréttismálum. 

Vegna mikillar aðsóknar hefur staðsetningu námskeiðsins verið breytt. Það verður haldið í Odda, stofu 101, í byggingu Háskóla Íslands að Sturlugötu 3, 101 Reykjavík. Skráningu er lokið en rúmlega 100 manns skráðu sig. 

Jafnréttisnefnd KÍ og Jafnréttisstofa bjóða grunnskólakennurum upp á hagnýtt námskeið í jafnréttis- og kynjafræðikennslu. Námskeiðið er aðallega hugsað fyrir kennara í efri bekkjum grunnskólans (5.-10. bekk) og hentar fyrir kennara í öllum fögum. Námskeiðið fer fram fimmtudaginn 18. ágúst kl. 14-16 í Kvennaheimilinu Hallveigarstöðum, Túngötu 14 í Reykjavík. Skráning á námskeiðið fer fram á HÉR Ekkert þátttökugjald en nauðsynlegt er að skrá sig! Sjá einnig facebook síðu námskeiðsins HÉR

Jafnréttisstofa hefur tekið á móti og samþykkt jafnréttisáætlanir hjá 54 af 74 sveitarfélögum landsins. Þetta eru heimtur upp á 73%, sem telst mjög góður árangur. Í samræmi við 12. gr. jafnréttislaga nr. 10/2008 kallaði Jafnréttisstofa eftir jafnréttisáætlunum  frá öllum sveitarfélögum í október 2015. Jafnréttisstofa fór yfir allar innsendar jafnréttisáætlanir og gerði athugasemdir við þær kom með  ábendingar eftir því sem átti við. Um mánaðamótin júní/júlí var verkefninu lokið af hálfu Jafnréttisstofu, en þá var ítrekað búið að hafa samband við þau sveitarfélög sem ekki voru búin að senda inn jafnréttisáætlanir til samþykktar. Jafnréttisstofa tekur að sjálfsögðu enn á móti jafnréttisáætlunum frá þeim sem ekki hafa skilað áætlun til samþykktar ennþá.

Landsfundur jafnréttisnefnda sveitarfélaga verður haldinn á Akureyri föstudaginn 16. september n.k. Í tengslum við fundinn boðar Jafnréttisstofa til ráðstefnu í tilefni fjörutíu ára afmælis jafnréttislaga. Ráðstefnan, sem er öllum opin, fer fram fimmtudaginn 15. september.